ពិភពកំណាព្យខ្មែរ កវី ខេត្តស្ទឹងត្រែង: សំលេងជ្រូកស្រែក

បទពាក្យ៨ទំនើប

១. សំលេងជ្រូកស្រែកសម្រែកខ្លោចផ្សា ខ្ញុំឮពេលណាចិន្តាតក់ស្លុត

ដង្ហើមផ្តើមខ្សោយដង្ហោយស្ទើផុត ចិត្តខ្ញុំស្រយុតរន្ធត់ចិត្តក្រៃ។

២. ចងភ្ជាប់ម៉ូតូស្រែកថ្ងូឈឺចាប់ ហាក់ផ្តាំមុនស្លាប់ភ័យខ្លាចក្សិនក្ស័យ

តែគង់មិនផុតពីការប្រល័យ ដល់ផ្ទះបានដៃចាក់កសម្លាប់។

៣. នេះគឺរឿងពិតខ្ញុំឃើញច្បាស់ភ្នែក ទុក្ខផ្តើមបែកមែកចិត្តព្រួយកាយយ៉ាប់

ជ្រូកប្រឹងស្រែកថ្ងូរសូរគ្មានអ្នកស្តាប់ គេមិនយល់សព្ទ័វាប្រាប់សោកទ្វេ។

៤. ហាក់សុំសន្តោសស្រីប្រុសមេត្តា ដល់ជ្រូកផងណាមិនចង់ស្លាប់ទេ

ទោះមនុស្សសត្វទាំងខ្ញុំទាំងគេ តែងគិតគ្នាន់គ្នេរប្រាថ្នាជៀសស្លាប់។

លីម ចំរើន ២៩.០៣.២០១២

ពិភពកំណាព្យខ្មែរ កវី ខេត្តស្ទឹងត្រែង