ពិភពកំណាព្យខ្មែរ កវី ខេត្តស្ទឹងត្រែង: មនុស្សនិងលុយ

(បទក្របចក្រវាឡមេពាក្យ១២ថ្មី)

១. មនុស្សនិងលុយ ស្អុយកេរ្តិ៍ឈ្មោះ ព្រោះតែវា ជាទម្លាប់

មិនខ្លាចងាប់ ជាប់ប្រចាំ កម្មលែងព្រឺ ឌឺសាងបាប

ទោះគេឃាត់ មាត់ប្រឹងហាម តាមមិនបាន ប្រាណឆ្អេះឆ្អាប

ច្បាប់បង្រ្កាប សាបឥតន័យ អ្វីបន្តិច ល្បិចអាងលុយ។

២. ស្ទូចអ្នកចាប់ ច្បាប់នៅក្រៅ ហៅលែងលឺ ឌឺអស្ចារ្យ

អាងដុល្លារ ចារទង្វើ ធ្វើអាក្រក់ ល្អក់ក្លិនស្អុយ

តាមគ្នីគ្នា ពាលាចិត្ត គិតគ្រប់ស្នៀត ឆ្លៀតរកលុយ

តកន្ទុយ រុយសុំខ្មាស់ ច្បាស់មិនខ្លាច កាចចិត្តហ៊ាន។

៣. ធ្វើគ្រប់យ៉ាង កាងលួចលាក់ ជាក់រលួយ ពួយស៊ីនុយ

មនុស្សនិងលុយ រុយនិងអាចម៍ កាច់កុងគ្នា ពៀរបំពាន

ឫកក្អេងក្អាង សាងសព្វហេតុ ប្រេតសុំខ្មាស់ ច្បាស់ដូចព្រាន

ជួញគ្រឿងញៀន ឃ្លានកាប់ឈើ ធ្វើគ្រប់កល ខ្វល់សង្គម។

៤. មនុស្សនិងលុយ នុយជីវិត ពិតកំណាច កាចអស្ចារ្យ

គ្មានមេត្តា ថាខុសត្រូវ នៅលើលុយ ស្អុយរងំ

បែកសាមគ្គី ស៊ីគ្នាឯង ក្រែងមិនមាន ហ៊ានសើចយំ

សាងគំនុំ គុំគ្រប់ញាតិ ឃ្លាតច្បាប់សាង កាងព្រោះលុយ។

នៅៈ ថ្ងៃអង្គារទី០៧ ខែមិថុនា ឆ្នាំ២០១១ (ម៉ោងៈ ៧ៈ២០នាទីព្រឹក)

Tel: ០១២ ៥១៩ ១៣៧/០១១ ៣៧៨ ១៧១

ពិភពកំណាព្យខ្មែរ កវី ខេត្តស្ទឹងត្រែង