ធម៌នាំកើតក្តីសុខ

(បទព្រហ្មគតិ)

       ១.    ធម៌នាំកើតក្តីសុខ              ពេញទាំងស្រុកទីជិតឆ្ងាយ

              បាត់គ្រោះជួបសប្បាយ      ចិត្តនិងកាយអស់កង្វល់។

       ២.   គឺធម៌បួនប្រពៃ                  មួយខន្តីប្រយោជន៍ផ្តល់

              មេត្តា.ករុណាខ្វល់             សុខសោយសល់មុទិតា។

       ៣.   ខន្តីគឺមិនខឹង                     មេត្តាដឹងយល់បញ្ហា

              តាំងចិត្តករុណា                 មុទិតាជនផងគ្នា។

       ៤.    ធ្វើបានពិតសប្បាយ           សុខចិត្តកាយគ្រប់វេលា

              ព្រោះឈ្នះសត្រូវមារ         សុខហូរហៀរនៅក្នុងចិត្ត។

       ៥​.    ផ្តល់តែជោគសិរី               ឃ្លាតទុក្ខភ័យសុខសាន្តពិត

              ភ្នែកភ្លឺមិនងងឹត                 ថ្លាដួងចិត្តមិនអបលក្សណ៍។

       ៦.    គប្បីកាន់ជាប់ខ្លួន              ធម៌ទាំងបួនរកទុកដាក់

              ពិតថ្លៃជាងមាសប្រាក់        ឈ្នះអមតៈមង្គលក្រៃ។

លីម ចំរើន ០៨.១០.១២

ទំនួញប្រេតហែកលោក

(បទព្រហ្មគតិ)

                   ១.        ទំនួញប្រេតហែកលោក                               រសាត់មកចូលតាមសោតា

                              ហាក់ដាស់អស់ខេមរា                                  ពុទ្ធសាសនាត្រូវទៅវត្ត។

                   ២.       មិនត្រូវភ្លេចសញ្ចឹង                                      ធ្វើមិនដឹងល្ងិតល្ងង់ភ្លាត់

                              ភ្ជុំបិណ្ឌត្រូវទៅវត្ត                                        ហាមតមាត់ធ្វើព្រងើយ។

                   ៣.       កូនចៅត្រូវតបគុណ                                    ក្រែងទុក្ខធ្ងន់ព្រោះធ្វើពើយ

                              ដូនតាមិនព្រងើយ                                       កូនចៅឈ្លើយលោកផ្តាសា។

                   ៤.        ព្រោះពេល១៥ថ្ងៃ                                        ពិតតម្លៃហួសឧបមា

                              គ្រប់ប្រេតតែងប្រាថ្នា                                   ល្បើយទុក្ខាដោយមគ្គផល។

                   ៥.        កូនចៅធ្វើបុណ្យទាន                                   សទ្ធាមានចិត្តខ្វាយខ្វល់

                              ឧទ្ទិសបុណ្យកុសល                                    បញ្ជូនផ្តល់ដល់ពូកគាត់។

                   ៦.        ដែលរងទុក្ខរយឆ្នាំ                                       ព្រោះតែកម្មដែលខុសភ្លាត់

                              ចិញ្ចឹមកូនធំធាត់                                         ស៊ីគ្រប់មាត់ធ្វើគ្រប់យ៉ាង។

                   ៧.       រឿងអាក្រក់រឿងល្អ                                      ធ្វើបន្តប្រព្រឹត្តអាង

                              ចុងក្រោយគ្មានសំណាង                              កម្មពៀរសាងកើតជាប្រេត។

                   ៨.        ដើររកប្រាំពីរវត្ត                                           កូនចៅគាត់ព្រោះចង់ឆ្អែត

                              បុណ្យបាបពិតមានហេតុ                              កើតជាប្រេតព្រោះកូនចៅ។

                   ៩.        សូមអស់កូនចៅក្រោយ                               ស្តាប់បានហើយឈប់ល្ងង់ខ្លៅ

                              ធ្វើបុណ្យកុំចិត្តក្តៅ                                       ទើបគេហៅកូនដឹងគុណ។

                   ១០.     ដូនតាពិតជូនពរ                                         ចិត្តសាទរស្បើយទុក្ខធ្ងន់

                              កូនចៅកើនទ្រព្យធន                                   ហួសបូកគុណសោយមង្គល។

លីម ចំរើន ០៧.១០.២០១២

ក្បួនយកឈ្នះចិត្តខឹង

(បទព្រហ្មគតិ)

     ១.     ក្បួនយកឈ្នះចិត្តខឹង                   កូនត្រូវដឹងគឺខន្តី

              កាន់បានពិតសិរី                         គ្មានគ្រោះភ័យដល់អាត្មា។

     ២.    មានរឿងកូនត្រូវគិត                    ប្រើគំនិតដោយបញ្ញា

              រកប្រភពបញ្ហា                            ដោះផ្លូវណាទើបកូនឈ្នះ។

     ៣.    មិនមែនឈ្នះដោយច្បាំង             អាងកំលាំងក្បត់ធម៌ព្រះ

              ឈ្លោះទាស់យកចាញ់ឈ្នះ          គួររលះបោះបង់ឆ្ងាយ។

     ៤.     កូនពិតអាចឈ្នះគេ                     តែមាសមេអាចសោកស្តាយ

              ព្រោះមិនឈ្នះចិត្តកាយ                ពិតខ្វល់ខ្វាយផលផ្តល់ឲ្យ។

     ៥.     ចិត្តកូនពិតមិនស្ងប់                      អាចធៀបឡប់ដែលបណ្តោយ

              ឲ្យខឹងដឹកមុខហើយ                    ផលខាងក្រោយអាចរងទុក្ខ។

     ៦.     ឈ្នះគេផងទាំងឡាយ                 កុំសប្បាយត្រូវចាំទុក

              គង់ចាញ់នៅថ្ងៃមុខ                      សោយសោកទុក្ខជាក់មិនខាន។

     ៧.    ឈ្នះដែលមិនចេះចាញ់                កូនសម្លាញ់គ្រប់ៗប្រាណ

              គឺឈ្នះចិត្តកល្យាណ                    ខន្តីបានពិតមង្គល។

លីម ចំរើន ០៥.១០.២០១២                                          

ចោរក្នុងចិត្ត

(បទភុជង្គលីលា)ប្រស្នា

    ១.  ចោរក្នុងចិត្តពិតច្រើនក្រៃ           អាចកើនរាល់ថ្ងៃ                ឥតដៃឥតជើង។

    ២.  តែងប្លន់ក្តីសុខរូបយើង              បីដូចឱបភ្លើង                    ឬឈ្លើងបឺតឈាម។

    ៣.  បើភ្លេចខ្លួនមិនបានត្រៀម          វាហាក់អង្កៀម                   ឥតស្ងៀមស៊ីសុខ។

    ៤.  វានាំចិត្តកាយចាប់ចុក               រស់មិនស្រណុក                សម្រុកប្លន់ចិត្ត។

    ៥.  ភ្នែកភ្លឺហាក់ប្រែងងឹត                ចោរនោះហាក់បិទ             នៅជិតគ្រប់គ្រា។

    ៦.  បំផ្លាញក្តីសុខគ្រប់គ្នា                បើមិនស្ទុះស្ទា                   ការពារទប់ស្កាត់។

    ៧.  ខ្លះកាយមនុស្សចិត្តសត្វ            វិជ្ជាបង់បាត់                      ខ្យល់ផាត់ទៅឆ្ងាយ។

    ៨.  ចោរនោះគឺអ្វីសូមស្រាយ           ប្រាប់ន័យក្បោះក្បាយ         កកាយប្រាប់ផង។

    ៩.  ខ្ញុំសួរអ្នកអានឆ្លើយសង            កុំបីសៅហ្មង                     សុំល្បងគំនិត។

    ១០.ចោរនោះជាក់នៅក្នុងចិត្ត           ដូចពាក្យទោសពិត             ជាប់ស្អិតផ្សំអៈ។

    ១១.ទើបស្តែងរូបអបលក្ខណ៍           ជួនឈ្លោះកាប់ចាក់            ដល់ថ្នាក់ជួបភ័យ។

    ១២.ធៀបចោរក្នុងចិត្តពួនឆី             ចាំប្លន់សុខី                       ប្រុសស្រីគ្រប់ប្រាណ។

    ១៣.ចំណោទងាយមិនយ៉ាប់ស្មាន     ចោរនោះស្តែងប្រាណ         ឆ្លើយបានរហ័ស។

    ១៤.មិនថាក្មេងមិនថាចាស់              តែងជួបច្រើនណាស់          ចិត្តប៉ះរាល់ថ្ងៃ។

    ១៥.បើមិនស្គាល់ចោរចង្រៃ              ពិតគួរឲ្យវ៉ៃ                       មួយដៃចំមាត់។

    ១៦.ព្រោះប្រាប់អស់ហើយឆ្លើយភ្លាត់ ឬគួរឲ្យទាត់                      កុំឃាត់បីជើង។

    ១៧.ដូចនេះចង់សុខត្រូវយើង          ចាប់ចោរចិត្តភ្លើង               ឬឈ្លើងបឺតឈាម។

    ១៨.បោះបង់ឲ្យឆ្ងាយកុំស្ងៀម           ត្រូវប្រុងចិត្តត្រៀម              សង្រ្គាមតាំងចិត្ត។

    ១៩.យកប៉ូលីសមួយខ្លាំងពិត           មកការពារចិត្ត                   ជាក់ពិតខន្តី។

    ២០.ផ្តល់តែមង្គលនិងសិរី                ក្មេងចាស់គ្រប់វ័យ              គប្បីរក្សា។

លីម ចំរើន ២៣.០៩.២០១២

វដ្តសង្សារ

(បទពាក្យ៨ទំនើប)

    

           ១. វាលវដ្តសង្សារ^១វាសនាមិនទៀង                             បីដូចមេឃភ្លៀងជួនថ្ងៃជួនយប់

               ឬដូចធម្មជាតិប្រួលប្រែឥតឈប់                              ដូចជីវិតភប់ជួនសុខជួនទុក្ខ។

           ២. កើតមកមួយជាតិធាតុតែមួយចាន                           ស្លាប់ទៅឥតបានយកអ្វីទៅមុខ

               មានតែផលកម្មរងចាំផ្ញើទុក                                    សែបសោយកើតទុក្ខផលបុណ្យកម្មពៀរ។

           ៣.អ្នកឈ្នះគេមែនកុំថាឯងគ្រាន់                                 សង្សារព័ទ្ធព័ន្ធគង់យ៉ាប់ដូចគ្នា

               អ្នកធំអ្នកតូចកុំប្រឹងបំពារ                                       បំពានចិត្តមារគ្មានប្រយោជន៍ឡើយ។

           ៤. ជាក់ស្តែងអ្នកធំថ្កុំថ្កើងទៅបាន                                ព្រោះអ្នកតូចច្រានរកប្រយោជន៍ឲ្យ

               ធំតូចពឹងគ្នាមិនអាចខ្វះឡើយ                                 បើបានសុខសោយគិតអ្នកជួយផង។

           ៥. រស់សុខតែឯងពិតមិនអាចមាន                               បើចិត្តល្មោភហ៊ានបំពានញយដង

               ក្រោយពិតរងគ្រោះឈឺចាប់កន្លង                            លទ្ធផលទ្វេសងសល់ត្រឹមសោកស្តាយ។

           ៦. ជាក់ស្តែងបើយើងកាប់អស់ព្រៃឈើ                         ធម្មជាតិអាចធ្វើឲ្យយើងអន្តរាយ

               ខ្យល់ព្យុះ.ទឹកជន់បង់ទ្រព្យសោកស្តាយ                    ហួសការបកស្រាយច្បាប់វដ្តសង្សារ។

           ៧.ជីវិតមនុស្សសត្វនៅលើលោកិយ                             មិនថាជាអ្វីពិតគួរពិចារណ៍

               កើតចាស់ឈឺស្លាប់ជាច្បាប់សង្ខារ                           ឯរឿងអស្ចារ្យគឺហេតុនិងផល។

           ៨. ផលកើតពីធ្វើសព្វរឿងនានា                                   អ្នកត្រួតតគ្នាព្រោះមានកង្វល់

               ខ្លាំងខ្សោយឈ្នះចាញ់គឺជាលទ្ធផល                         គប្បីខ្វាយខ្វល់ប្រឹងរក្សាគ្នា។

•វដ្តសង្សារ^១ គឺការវិលទៅមក,ដំណើរអន្ទោលទៅមក,ដំណើរអន្ទោលកើតស្លាប់មិនឈប់មិនស្រាក។

លីម ចំរើន

២១.០៩.២០១២​(ម៉ោង ០៣ៈ៥០នាទីព្រឹក)

ទោសៈលោភៈ

(បទកាកគតិ)

       ១. ទោសៈលោភៈ         កូនអើយដូចយក្ស     ឬចោរលួចសុខ

           បើកូនមានច្រើន        ពិតកើតចាប់ចុក        កាយចិត្តស្រណុក

                                         ហាក់រត់គេចឆ្ងាយ។

       ២. បើគ្មានទោសៈ          លោភៈកាប់ចាក់       ប្លន់ក្តីសប្បាយ

           កូនពិតគ្មានភ័យ        សុខីចិត្ត.កាយ          ញាតិផងទាំងឡាយ

                                         ចោមរោមស្រលាញ់។

       ៣.                              កូនអើយលោភៈ       ទោសៈនេះជាក់    គួរស្អប់ខ្ពើមក្នាញ់

           កុំបីយកទុក              ផ្កាប់មុខស្រលាញ់     មិនមែនសម្លាញ់

                                         វាគឺសត្រូវ។

       ៤. បើចង់សុខសាន្ត        កូនៗគ្រប់ប្រាណ      ត្រូវយកកាព្យឪ

           ទន្ទេញឲ្យចាំ            ចំណាំពាក្យត្រូវ        ប្រតិ្តបត្តិជាប់ទៅ

                                         ពិតផ្តល់មង្គល។

លីម ចំរើន ២១.០៩.២០១២

(ម៉ោង ០២ៈ៥០នាទីព្រឹក)

កុំតូចចិត្ត

(បទពំនោល)

       ១. កុំតូចចិត្តឃើញគេមាន               ចិត្តល្មោភលោភហ៊ាន         បំពាន់ខុសច្បាប់សង្គម។

       ២. គួរខ្មាស់អ្នកផងសើចយំ             ស្អុយឈ្មោះរងំ                   សង្គមមិនឲ្យតម្លៃ។

       ៣. ជាមនុស្សរស់នៅរាល់ថ្ងៃ           កូនកុំចង្រៃ                          ត្រូវថ្លៃកុំប្តូរយកប្រាក់។

       ៤. ការងារអាស្រូវអបលក្ខណ៍         ស៊ីលុយស៊ីកាក់                   ច្រវាក់ជាប់ដៃជាប់ជើង។

       ៥. បីដូចជាឱបដុំភ្លើង                      គង់មានវេនយើង                ធ្លាក់ទ្រើងរងគ្រោះមិនខាន។

       ៦. កុំវក់ហឺហាមានបាន                   ទុច្ចរិតសាមាន្យ                   សុខសាន្តពេលនេះមែនហើយ។

       ៧.តែគង់អាចពេលចុងក្រោយ           កម្មផ្តន្ទាឲ្យ       សល់សោយវិត្តបត្តិគ្រោះពិត។

       ៨. ខ្វាយខ្វល់បារម្ភគេងគិត​             ព្រោះទង្វើស្និទ្ធ                   ទុច្ចរិតចិត្តស្ងប់គ្មានឡើយ។

       ៩. មុខពិតញញឹមមែនហើយ           តែដេកលើខ្នើយ                 អាចឲ្យព្រួយភ័យគ្រប់គ្រា។

       ១០.ខុសពីអ្នកផងនានា                   ចិត្តសល្អជា                        គ្រប់គ្នាអាចគ្មានបារម្ភ។

       ១១.រឿងគេចាប់ចងវាយដុំ              ព្រោះធ្វើមិនសម                 បន្លំទង្វើទុច្ចរិត។

       ១២.ដូចនេះកូនប្រុសត្រូវគិត           អំពើសុចរិត                        ប្រព្រឹត្តិផ្តល់តែមង្គល។

លីម ចំរើន

១៥.០៩.២០១២