ពិភពកំណាព្យខ្មែរ កវី ខេត្តស្ទឹងត្រែង: សុខគ្រហែតភ្លែតរសាត់

(បទភុជង្គលីលា)

១. សុខគ្រហែតភ្លែតរសាត់ ហាក់ដូចខ្យល់ផាត់ រសាត់ទៅឆ្ងាយ។

២. មិនគួរប្រុសស្រីខ្វល់ខ្វាយ ខ្លះឆ្កួតសប្បាយ វក់កាយឃ្លានឆី?

៣. តើដឹងឬមិនដឹងអី? សុខហាក់គ្មានន័យ គ្មានអ្វីទាំងអស់។

៤. មិនគួរឡើយឲ្យស្រណោះ ចាប់មិនបានសោះ គួរដោះណាយគេច។

៥. កុំឆ្ងាញ់ខ្លាំងអាចលង់លិច បើសប្បាយភ្លេច ចិត្តធ្មេចមិនភ្លឺ។

៦. ស៊ីណាស់ឃ្លានណាស់អាចឈឺ កាយ.ចិត្តជំងឺ គួរព្រឺគួរខ្លាច។

៧. វាគ្មានរូបរាងតែកាច តែងលងបន្លាច អង់អាចជាងមនុស្ស។

៨. ស៊ីច្រើនកើនទុក្ខយ៉ាប់ជុះ ឬលាងជំរុះ ឡាទ្រូស^១តាំងចិត្ត។

៩. ស្វែងយល់សិក្សាពិនិត្យ ដោយគតិពិត ជីវិតមង្គល។

១០. បើមិនគិតស្និទ្ធរវល់ ពិតផ្តល់អំពល់ ឲ្យយល់មិនខាន។

១១.ជីវិតមិនសូវសុខសាន្ត វាតែងរំខាន គ្រប់ប្រាណគ្រប់វ័យ។

១២. សូមជួយរកពាក្យសេចក្តី តើគឺសុខអ្វី? ធៀបន័យគ្រហែត។

១៣.សុខមិនយូរហើយបាត់ភ្លែត ឈឺយ៉ាប់រកពេទ្យ គ្រហែតឃ្លាតឆ្ងាយ។

១៤. ផ្តើមដោយស្រីប្រុសពីរកាយ ផ្សំដោយរូបកាយ សប្បាយសោយឆី។

១៥. សផ្សំង.ឈរចាំស្រី នាង.វហាក់ភ័យ រូបស្រីពួនក្រោម។

១៦.ហៅអាចាប់ងកុំផោម ថែមសមុខចោម យល់ឆោមន័យច្បាស់។

-ឡាទ្រូស^១ គឺពាក្យគ្រលាស់មានន័យសំដៅថាៈ លុះត្រា។

លីម ចំរើន ១៨.០៩.២០១២ (ម៉ោង៤ទាប់ភ្លឺ)

ពិភពកំណាព្យខ្មែរ កវី ខេត្តស្ទឹងត្រែង